Foto:Shutterstock

Pastrimi pranveror është një punë e madhe për shumicën, dhe radhitja e gjërave është faza numër një. Pastaj është dhurimi i gjërave tek dikush i cili i përdor ato. Për këtë ThredUp, një dyqan online i dorës së dytë i themeluar në vitin 2009, ka zhvilluar biznesin gjatë viteve për t’i përshtatur nevojat e ndryshme të blerësve dhe shitësve.

Kompania, e cila u dërgon përdoruesve çanta të veçanta që t’i mbushin me gjërat e padëshiruara pastaj i merr ato nga shtëpitë e tyre, filloi si një vend për të blerë dhe shitur rroba të fëmijëve. Slogani i saj ishte, ‘’Rrobat nuk rriten. Por fëmijët po. Por duke bërë disa kërkime te konsumatorët, themeluesi James Reinhart dhe ekipi i tij e kuptuan se mundësia e tyre më e madhe do të ishte në rrobat e femrave.

‘’Si një ndërmarrës, njëra prej gjërave që i mësoni është se duhet të eksperimentoni me mundësitë për të rritur pjesë të reja të biznesit’’, thotë Reinhart. ‘’Konsumatori nuk e di 100 përqind të kohës se çfarë dëshiron, por nëse jeni të zgjuar, ju mund t’u bëni atyre pyetje për problemet në jetën e tyre dhe se si mund t’i zgjidhni ato. Unë mendoj se ju mund të krijoni mundësi për të përmirësuar produktin dhe kompaninë’’.

Ai thotë se gjithmonë e ka përëftyruar ThredUp si një biznes i cili bën gjëra të mira për dollapët e njerëzve, për kuletat dhe për planetin. Çantat e tij thonë ‘’kjo çantë ka qëllime të mira’’ duke marrë parasysh faktin se asnjë artikull i ThredUp nuk deponohet. Një tjetër zbulim që kompania pati duke anketuar konsumatorët ishte se jo të gjithë shpresonin të fitonin para nga gjërat e tyre të padëshiruara. Disa donin vetëm një faturë tatimore. Kështu që ThredUp iu afrua organizatave bamirëse si Big Brothers Big Sisters dhe Feeding America për t’u dhënë shitësve mundësinë të dhurojnë paratë e tyre nga artikujt me një klikim butoni. Përderisa kjo ishte një gjë shumë e mirë për ta, kompania u përball me shumë pengesa, duke përfshirë se si të lëshonte fatura dhurimi për konsumatorët dhe të punonte mirë me organizatat bamirëse, thotë Reinhart.

Kompania është në rrugë të dyfishojë rritjen e saj për vitin e katërt me radhë. Entrepreneur foli me Reinhart për atë se si ndërmarrësit me qëllime të mira duhet t’i ndërtojnë ato në themelet e kompanive të tyre.

Çfarë keni mësuar për rritjen përderisa keni pasur qëllime të mira?

Mendoj se është pjesë e ADN-së nga fillimi. Kompanitë e mira të cilat rriten dhe japin një shërbim të mrekullueshëm të konsumatorëve, fillojnë me nocionin për të pasur ndikim në botë. Mendoni për Toms Shoes, Warby Parker, Zappos, disa prej këtyre kompanive të mëdha. Nuk mendoj se qëllimi i tyre i mirë ka ardhur më vonë. Rritja bashkohet dhe përshpejtohet kur keni qëllime të mira.

Çfarë keni mësuar për kulturën përderisa keni pasur qëllime të mira?

Ne kalojmë shumë kohë duke folur për kriteret e duhura për kontrollimin e cilësisë dhe si të trajtojmë rrobat e konsumatorëve me kujdes në anën e jashtme dhe të brendshme. Ne paketojmë gjithçka në kuti ngjyrë kafe dhe i mbulojmë ato me letër, dhe gjuha që e përdorin punonjësit është si t’iu dërgojnë një dhuratë një shoku.

Në konferencën tonë të tretë vjetore, në vend se t’u japim punonjësve nga një bluzë me çmim 25 dollarë dhe një fletore, ne u dhamë nga 25 dollarë çdo personi në ekipin e korporatës, rreth 150 njerëzve, në njërën prej katër organizatave. Për mua, ka të bëjë me gjërat e vogla të cilat i bëjmë në kulturën tone e cila rrënjos nocionin e qëllimeve të mira.

Çfarë këshille keni për bizneset tjera të cilat kanë qëllim të mirë?

Shumë ndërmarrës duhet të jenë të kujdesshëm që të mos fokusohen vetëm në qëllimin e mirë, sepse ju duhet të ndërtoni një biznes të mirë i cili ka sukses afat-gjatë. Merrni shembullin e Warby Parker. Nëse ata do shisnin syze të shëmtuara, askujt nuk do i interesonte për aspektin e tyre bamirës. Kështu që, unë gjithmonë inkurajoj ndërmarrësit të sigurohen se po plotësojnë një nevojë të rëndësishme për konsumatorin, dhe në të njëjtën kohë t’a bëjnë konsumatorin të ndihet mirë për atë përvojë bamirëse.